El vienres 30 Xunetu estrenóse nel Palacio Valdés l’espéctáculu Inda Suenen. Col aforu completu venti muyeres salieron a escena pa entamar un espectáculu que de xuru recordaráse durante munchu tiempu. Muyeres gustaron y muncho, el públicu premió colos sos aplausos un llabor de meses d’esfuerzu y de trabayu. Mereció la pena, el resultáu foi’l qu’esparábemos.
Queremos dar les gracies a Factoría Norte y a Carmen Gallo por ayudanos a facer realidá esti espectáculu, a Borja Roces por introducinos nel mundu teatral y sacar lo meyor de caúna de nosotres, a Ana Morán por ser la voz de toes nosotres, y al Beltaine qu’otru añu más nos demostró que con ganes y esfuerzu les coses pueden facese perbien.
Pero si esti espectáculu foi un ésitu ye méritu de Marisa Luque y de Constantino Menéndez. Munches gracies a los dos. A Marisa por tener siempre tan bones idees, y a Constantino por facer realidá esti proyeutu, porque a partir de la idea orixinal lu desarrolló de principiu a fin y porque ye l’alma d’esti espectáculu. Gracies Cos por confiar en nosotres y por volver a ilusionarnos y facer que Muyeres vuelva a tar más vivu que nunca, porque gracies al to trabayu MUYERES INDA SUENEN.
Esti proyeutu naz nel senu de l’Asociación Música tradicional Muyeres, col enfotu de da-y un xiru al trabayu qu’esti coleutivu vien desarrollando dende hai más de 10 años. Ye un espectáculu multidisciplinar nel que s’entemecen la música en direutu cola interpretación teatral, baille, proyección d’imáxenes, vídeos… La puesta n’escena, corre a cargu de Factoría Norte, compañía de reconocíu prestixu y d’amplia esperiencia.
Nesti espectáculu vamos a la gueta d’un viaxe emocional, onde la muyer ye la protagonista. Esti recorríu entama nel presente, pero ensín olvidar el pasáu y apuntando hacia’l futuru.
Trenta y cinco muyeres que vienen de los más reconocíos grupos etnográficos asturianos xuntáronse hai ya casi venti años p’amosar y grabar los toques de panderu y pandereta qu’acompañen al cantar n’Asturies. El proyeutu camudó nun reconocimientu al papel de la muyer asturiana como depositaria de bona parte de la tradición musical del país. Cuatro discos nel mercáu (Muyeres I, Muyeres II, Pasamentu y Onde canta la culiebra); el montaxe de dellos espetáculos nacionales ya internacionales; collaboraciones con músicos como Jose Ángel Hevia, Ramón Prada, Chus Pedro, Tina Gutiérrez; la participación en dellos festivales (Festival Folk Segobia, Xosé Alfonso Seixal, Lorient, Expo de Lisboa, San Marino, Sabandeño de La Laguna, Les Anthioises); la obra Kelthiké de Ramón Prada, basada na voz tradicional asturiana, onde Muyeres ye la principal protagonista, algamando muncho ésitu de públicu y crítica … ficieron del grupu una de les referencies d’anguaño de la nuestra música tradicional.
Factoría Norte estrena hai doce años “Federico Federico”, espectáculu dirixíu a públicu infantil y xuvenil. Dende entós y hasta agora produz dellos espectáculos enfocaos a la infancia, como “El Circo: el espectáculo debe continuar”, col que llogra’l Premiu FETEN; “Son-nidos”, Premiu Asturies al Meyor Espectáculu Infantil; “La niña de la Nube”, “Una Maleta llena de Agua”, “Piripiratas”…
Pon n’escena montaxes como “Galileo” de Brecha, coproducíu con LÓm Imprebis, Teatru Xovellanos y Teatres de la Generalitat Valenciana, col que llogra, entre otros, el Premiu Ercilla; “Mirad: un chico de Bosnia” de Ad de Bont, o “Más Vale Trocar”, sobre la vida de Juan del Encina.
A lo llargo de 2009 produz cuatro espectáculos mui distintos: una traxedia, “ALMAELECTRA”, estrenada nel Teatru Xovellanos de Xixón, cola que non solo consigue mui buenes crítiques, sinón que ye nominada a los MAX REVELACIÓN y consigue dellos premios nos Premios Oh! D’Asturies 2010; el so primer espectáculu de danza, “KUZBU”, qu’estrénase en Danza Xixón y ye seleccionáu pa participar nel Festival FMR de Montluçon (Francia); “Performance” del autor asturianu Jorge Moreno y Premiu Asturies Xoven de Testos Teatrales 2004; y “Y Güelita cruzó el Universo”, espectáculu dedicáu a la xeneración de muyeres nacíes poco antes de la Guerra Civil.
Factoría Norte trabaya tamién n’investigación y formación. Desarrolla dellos proyectos nos que trabaya sobre la incidencia de les artes escéniques nel mundu la integración con persones en riesgu d’esclusión social, nel mundu la intercurturalidá, de la cohesión social, etc. Y lleva’l programa de “Mujeres a escena” de Tiempo Propio y Caixaescena, programa de teatru nos Centros d’Enseñanza Secundaria, promovíu pola Fundació La Caixa. Nel ámbitu del turismu, desarrolla la propuesta “Leyendas del casco Histórico de Avilés”,”Noches Artísticas de La Laboral”, “Noches Mágicas” del Xardín Botánicu… Nel ámbitu de la cultura tradicional asturiana, collabora cola Asociación “Escontra’l raigañu” en La Seronda d’Avilés; y lleva’l Proyectu PRUA con publicaciones, dosieres didácticos en llingua asturiana…
Nestos momentos collabora con Muyeres na producción de “INDA SUENEN” que s’estrena’l próximu día 30 Xunetu nel Teatru Palaciu Valdés d’Avilés.
